РИЗЫҚ АЛЛАДАН. ЕНДЕШЕ ОНЫ АДАЛ ЖОЛМЕН ІЗДЕ✅
Бір жас жігіт Қағбада «Уа, дұрыстардың көмекшісі болған Аллаһым! Уа, харамдардан сақтанғандардың жәрдемшісі болған Аллаһым! Саған шүкір етемін!» деп, қайталай береді.
Біреу келіп: «неге қайта қайта бір дұғаны қайталай бересің, одан басқа ешнәрсе білмеймісің бе?» деп сұрайды.
Сонда әлгі жігіт былай деп әңгіме тарқатады:
"Осыдан 7-8 жыл бұрын Қағбада жүргенде ішінде мың алтыны бар қалташық тауып алдым. Ішімнен бір дауыс: «бұл алтындармен мына-мына нәрселерді жасайсың!» деп, құтыртып жатқан еді. Өз-өзіме: «жоқ, бұл меніңкі емес, біреудің затын қолдануым харам болады” дедім.
Осы кезде біреудің «Мынадай қалташық тауып алған адам бар ма?» деген айғайын құлағым шалып, оны шақырдым. Қалташықты суреттеп оның ішінде 1000 алтынның бар екендігін айтқаннан кейін қалташығын егесіне қайтарып бердім.
Ол да маған қалташықтан шығарып 30 алтын берді.
Базарға бардым. Таза реңді бір жас тұтқын баланы мақтап сатып жатқан екен. Ол жас баланың тазалығы менің назарымды тартты. «Бұл тұтқын үшін қанша сұрайсың?» деп едім. "30 алтын" деп жауап берді. Алтындарды беріп ол жас баланы сатып алдым.
Арадан бір-екі жыл өтті. Жас бала өте еңбекқор және әдепті еді. Бір күні онымен кетіп бара жатқанда алдымыздан үш кісі келе жатты. Жас жігіт маған: «Мырзам, мен Фас әміршісінің баласымын. Мына келе жатқандар әкемнің адамдары. Мені іздеп жүргендер. Сенен мені сатуыңды сұрайды. Сен жақсы адамсың, 30 000 мың алтыннан төмен сатпа!» деді.
Үш кісі қасымызға келіп: «бұл тұтқынды бізге сатасың ба?» деді. «Сатамын бірақ 30 000 алтыннан төмен болмайды» дедім. Біраз саудаласып болмаған соң амалсыз қабыл етті. Алтындарды беріп жас жігітті алып кетті.
Мен бұл алтындармен жұмыс орындарын ашып, сауда-cаттықпен айналысып одан да байып кеттім. Бір күні туыстарым: «Өте бай бір отбасының жақсы бір қызы бар. Әкесі жақында қайтыс болды. Онымен сені үйлендірейік» деді. Мен де келісімімді бердім.
Неке қиылды. Түйеге артылып қыздың жасауын алып келді. Жасауының арасынан бір қалташық менің назарымды тартты. Жұбайыма: «бұл не қылған қалташық?» деп сұрадым. «Ішінде 970 алтын бар, әкем бір кездері Қағбада жоғалтқан екен. Тапқан адамға 30 алтынын беріпті. Жасауыңа қосарсың деп, қалғанын маған сыйлады» деп жауап берді.
Міне, бұл 1000 алтын менің рызығым екен. Кезінде иесіне қайтарып бермегенімде харам жолдан келер еді. Қазір болса адал жолмен қайта өзіме келді. Маған көмектесіп харамдардан қорғаған, көптеген ниғметтер сыйлаған Раббыма шүкір етемін… Ащы да болса шындықты айтыңдар. Бәрібір тағдырға жазғанын көресің… Несібеңнен артығын көрмейсің…
